Mei Freundin is en Schnäbbschejeeschä. Ob Bembel, Bischä, Bettvorleeschä, Fannedeggel, Fensdäkitt - Wann's billisch is, dann musses mit.
	So kaaft se sisch e Faxgerät - Net, daß se's werklisch brauche däät - Doch bei "Nur noch De-eM Zweihunnät!" Da wurd se schwach, was misch net wunnät.
	Es Leese dä Gebrauchsanleidung War fier mei Freundin Zeitväschwendung. Nur Steckä nei unn angeschalt' - Daß des net reischt, denkt merr sisch bald.
	Se hat dann hin unn hä probiät Unn misch denaach aach involviät, Denn stellt nach Kauf sisch Reue ein, Dann hab die Abbeit isch am Bein.
	So nahm mit Ruh unn Sachvästand Die Anleidung isch miä zuä Hand Unn hab nadüälisch festgestellt, Wo's bei der Sach noch hakt unn fehlt.
	Um alles rischdisch gradzericke, Mußt merr aan Knöppsche rischdisch dricke. Des war, ihr Leut, der ganze Trick. En Mann im Haus is halt e Glick.
	So wär nun diese Klipp umschifft. Doch weiß isch schon, was misch betrifft: Es nächsde Schnäppsche is net weit Unn sorscht dehaam fier Heiterkeit, helau.	zurück